#حساب_وهمي
متل ما بالعالم الحقيقي في اصناف مختلفة من الناس كمان بعالم الانترنت في اصناف حسابات حقيقية و يلي بكون الشخص طالع بصفتو الحقيقية و صورتو و اسمو و معلوماتو الشخصية و في الحساب الوهمي يلي هوي عبارة عن اشخاص متخفين بشخصيات تانية يعني الاسم و المعلومات الشخصيةو حتى الجنس (ذكر او انثى ) غير صحيحة و هيي على انواع منها الخطر و منها الأقل خطورة و منها العادي.
1_ حساب وهمي بطابع حقيقي يعني بكون الشخص عم ينشر حياتو العادية و افكارو و ممكن الاصدقاء المقربين منو بيعرفوه و هيدا ببين من التفاعل بينن لكن بكون بإسم غير و شخصية غيرر ممكن ليهرب من كمرات المراقبة بعيلتو ممكن شغلو ما بيسمحلو ممكن وضعو الاجتماعي (هي النقطة خاصة اكتر بفئة من البنات )
2 _ حساب وهمي بيحكي سياسة هيدا الشخص بكون وهمي ليقدر يحكي سياسة برياحة و يقدر ينتقد الدولة و المجتمع و الفساد و يحكي بالمستجدات بالبلد او يحكي على جهة معينة من دون ما يتم ازعاجو بالشخصي او التعرض الو او لاحد افراد عيلتو او كمان كرمال يوصل صوتو بشكل اكبر لان ممكن الشخص يكون جريئ و يقدر يحكي الامور بإسمو بس الحساب الوهمي رح يكون ملفت للنظر اكتر لان العالم كلا رح تسأل مين هيدا الحساب ما بكون خطر بالعادة و ممكن ينكشف بسهولة من خلال نوعية البوستات المحصورة بالسياسة و رح تلاقي انو في ناس بيعرفوه الخطورة بتكون اذا كان عم يدس السم بالعسل و هيدا رح يكون النقطة التالية
3_ حساب وهمي مدسوس هيدا الحساب بجمع الناس حوليه و رح تلاقيه عم يبني صداقات بحاول تكون متينة مع كتير عالم (ممكن لجمع المعلومات) هيدا الحساب رح تلاقيه معتمد على زت فتيشات بتعمل فتنة و بينتقد دايما الخط يلي هوي مفروض ينتمي الو بنقط متل بتظهر الخط بشكل ضعيف متل فكرة انو الحزب لاي لهلق ما نزل ولا مسيرة بالسما (على سبيل المثال لا الحصر ) موجه من اطراف مغايرة للخط و بتم اكتشافو من انتقادو للصغيرة و الكبيرة و توهين الانجازات و الانتصارات مثلا الحزب راح يحارب بسوريا و ترك الكهربا و المي و طبعا ما مننسى ملاحظة هيدا في منو بس على توهين مذهب و فتنة دينية
4_ حساب وهمي بيستخدم صور عارضي ازياء و رجال وسيمين (غير معروفين ) هيدا حسابو كلو بنات عامل الجذب شكلو الحلو و التطبيل و التهليل للبنات ممكن يكون محتوى الحساب تافه و ممكن يكون على مستوى عالي من الثقافة و يرعى الأمور النسوية بشكل خاص( بتحسو على شوي رح يحبل و يخلف) و هيدا رح تلاقي بحط قلوب على اي بوست بتكتبوا اي بنت و بوافقها الرأي اغلب الاوقات و احب على قلبو يناقهطشها عالخاص ملاحظة : النوع المثقف ممكن ما يحط صورة زلمة حلو
5 _ هيدا الحساب نفس يلي فوق بس بكون جايي على مؤمن يعني صور السيد و الشهدا و السيد القائد (او اي رمز بحسب بيئتو و طائفتو ) و هيدا كمان بكون مجمع كل شي في بنات حوليه و بهلل و بطبل للبنات و اختاه و زنودك و عبايتك و كبدك و بيحكي بمنطق الدين ابتعاد عن الحرام و ليس الحياة يعني هوي مؤمن بس مش معقد و كمان بيحكي بمنطق نسوي و حقوق المرأة و هيدا بتلاقيه بالماسنجر جمالك و عيونك و شفافك و طريقتو ليفوت عالمسنجر اجمالا انو اختاه ما تحطي صورتك بس ليكي انت قمر و احيانا بيحكي كلام اكبر ملاحظة : 4 و 5 بتم استخدامهن لاستدراج البنات (يلي مش واعيين ) و بعدا بيوقعو ضحية الابتزاز
6 _ الحساب يلي بإسم بنت و هون الدسم هيدا بينقسم لقسمين ممكن يكون بتديرو بنت و ممكن بتكون بديرو شاب و ممكن شغل فردي يكون وراه جهة او عصابة ( حتى كمان بخصوص رقم 4 و 5 ) هيدا الحساب بيخلق لنفسو هوية حقيقية مزيفة (بعكس 1 و 2 يلي واضحين انن وهمي) هو بيبنوا روابط اجتماعية مع عدد كبير من الاصدقاء حتى مع ما يسمى “النخبة الثقافية او الجتماعية ” يلي بتكون قاعدتها ناس مثقفين كتّاب ناشطين و وجوه معروفة هيدا الحساب رح يكون يكون عندو من الجنسين رح يحكي بأفكار و امور تعتبر جريئة انو بنت تحكي فيها هيدا الحساب ممكن يستخدم صور بنت حلوة ليجذب بعض الشباب و حتى من النخبة (من برا الله و سمالله و من جوا شحار و تعتير) و ممكن من خلال الكلام فقط و مستوى الثقافة هيدا الحساب(سواء بنت او شاب ) رح يستدرج البنات ايضا بحجة الصداقة و بنات بين بعض لحتى يصير في حديث بأمور خاصة جدا تكون ممسك ضد المتكلم و ممكن صور اذا بنت محجبة تكون بلا حجاب اما بالنسبة للشباب رح يكون الحديث و الصور بطابع حميمي و احتمال التنين يوقعو ضحية ابتزاز للحصول على تشريجات تلفون و او مصاري او لتوريطهن بالدعارة (خاصة البنات و بتكون عصابة ) و رح توصل للعمالة مع العدو و هي الطريقة اكتر طريقة بتم اتباعها بالاضافة للاغراء بالمال (او تصوير الشاب مع بنت بوضع حميمي) و موجودة بكتب بتحكي عن اسرائيل.
اعداد : لولو رزق
