كان البابا يلبس خاتم عقيق أحمر أصلي من نحن وصغار..
كبرنا وضل هالخاتم بإيد البابا..
صار هالخاتم متل ذكرى ضل معنا من ايام طفولتنا..
بس كبرنا حطيت براسي بدي الخاتم، وخصوصا إنو انا كبير اخواتي الشباب..
فجأة وبدون سابق انذار بلاقي علي خيي من سنتين لابس الخاتم !
قلتلو: علي انت شو عامل؟ كيف ماخد الخاتم وليش؟؟
طلع علي حاطط براسو الموضوع اكتر مني وسابقني عند البابا واخدو !
قلتلو: مستحيل، الخاتم قلي وانا الكبير..
قام قلي: طلوب يلي بدك ياه بس تركلي الخاتم..
مرق شي اسبوعين وكانت وقتها زوجتي حامل بأول طفل..
وعلي خيي ضل ملاحقني بدو ياني سمّي إبني على إسمو “علي”.
انا كنت بدي سمّي اسم غير “علي”، قلتلو لا انسى الموضوع..
كل ما يشوفني يقلي بشرفك سمّي “علي”.. وانا قلو لا..
بس صارت زوجتي بالشهر السادس تقريبا، اجى لعندي قلّي:
معقول يولد إبنك بنفس يوم ميلادي؟ (ميلاد علي خيي السعيد في 20/10/1993)..
قلتلو لعلم عند الله..
بس قربت الولادة، اتفقت مع زوجتي نسمّي “علي” بناء لرغبة خيي “علي”..
جيت لعندو بدي حرقصو شواي، كنا بسهرة عائلية، وخلّيت زوجتي تفتح الموضوع، قام هوي تذكّر وقلّي: محمد بشرفك سمّي “علي” وشو ما بدّك طلوب..
قلتلو شو ما بدّي؟
قلي طلوب لبن العصفور وتكرم..
قلتلو رح سمّي “علي” بس عندي طلب..
قلي: شو ما بدك..
وعطاني مفتاح سيارتو قلي اذا بدّك خود السيارة !
قلتلو: بدي الخاتم !
هون علي خيي تغيرت ملامحو وعبّأ وصار يضحك…
قلّي: يا زلمة من وين خطرت ببالك، والله غلبتني فيها..
بعد ما صار الكل يضحك من يلّي صار، قام وقف وشلح الخاتم وعطاني ياه 💔
أنا بيني وبين نفسي ما كنت بدي آخدو بس بدي حرقصو شواي..
بس خلصت السهرة رجعتلو الخاتم وقلتلو تكرم عينك رح نسمّي “علي”.
كتير كتير انبسط ❤️
القصة ما خلصت…
“علي” إبني ولد بنفس يوم ولادة “علي” خيي !!
كمان القصة ما خلصت..
وقت صارت الحرب وكان “علي” خيي بشغلو وأكيد لابس الخاتم..
قدرت احكي معو، قام قلّي:
مشغول بالي على البابا يا خيي..
قلتلو: خير؟
قلّي: حلمت بالمنام إنو وقع الخاتم من إيدي وتشقّف ٤ شقف..
اتصل بالبابا وسلملي عليه أمانة..
بيني وبين نفسي أنا قلت: عم تخاف على البابا؟ وانت يلي حامل الخاتم يلي تشقّف؟
خلصت الحرب..
علي استش هد آخر يوم الحرب 🥀الخاتم تشقّف 🥀 علي مفقود الأثر 🥀
وتركلي أجمل هدية بالدنيا “علي” إبني.
