▪️ملاحظات عامة:
– الرد/الحرب/الضربة بس بدها تصير ما حدا رح يخبّر عنها، لا الك ولا لأي وكالة اخبارية ولا لمصدر مقرّب.
– ما تعيشها/يها عالناس انك شفت شي بالسما او سمعت شي حدك، اسمعهن وشوفن لوحدك وابعات اخبارك حصرا يا “صحافي” يا مخضرم يا ابو السبق الصحفي لموقع اخباري موثوق هني أشطر منك بتقييم الأخبار ومعرفتها اذا صحيحة او لاء! وهني أكتر كفاءة منك اذا مصلحة تنتشر هيك أخبار او لاء لأن سمعتهم الاعلامية أهم عندن من كب الاخبار شمال يمين من دون “تبيين”!
– الخوف والقلق يلي مبرر بمكان بس عند كتار مش مبرر طريقة تخويفهم للناس على قاعدة “اشهدوا لي أني أول من رأى وسمع” وبلالك ال”سبق صحفي” عيب!
– رائحة المسك يلي بس انت سبحان الله يلي بتسارع/ي انك بتشمّها وما فيك الا ما تخبّر/ي الناس عنها، شمّها لوحدك عالسكت ونحن منرجع منشمّها بس تفوح عبق ريحتها المقدسة من مصادرها الموثوقة، وبلا ما يعرفه اهل واصدقاء وأقارب الرائحة المقدسة منك لانك بنظرهم ونظر الكل رح تكون واحد بلا “اخلاق وبلا دين” ومش رح يزقفولك!
– النكت السمجة المتعلقة بالحرب للتسلية والمسخرة او يلي نابعة من الخوف اللاارادي صاروا كتير بايخين، بس منيح يتخفف شوي عالناس ببعض ترويح النفس بس مش عن الحرب.
– عدم التعامل مع الوضع باستخفاف واستهزاء وقلة وعي وقلة مسؤولية.
▪️المطلوب (ليلي مهتمين بسلامتهم الداخلية والنفسية):
– عدم الاشتراك بجروبات الأخبار Groups والقنوات Channels على الواتساب الا جروب واحد لقناة اخبارية واحدة بتوثقوا بأخبارها.
– ما تنشر/ي أخبار او معلومات عن شو سمعته وشو شفته لان بتصيروا عم تقدموا معلومات مجانية للعدو من حيث تدرون او لا تدرون! وهول التساؤلات بلاهن: مزبوط صار … ؟ شو هيدا انفجار او جدار؟ هيدا صاروخ دفاع جوي او عم يقصفوا؟ عم يقولوا …! ييي هيدا فلان! وغيرها من الشغلات يلي ما رح حدا يعطيكن جواب دقيق عنها الا الصفحات الاخبارية الموثوقة مش الصفحات الاخبارية والتحليلية لمحبي الأكشن الإخباري ومتصيّدي الاعجابات والمتابعات.
– ابتعدوا عن الحسابات يلي بتوتركم واذا ما بدكن تلغوها عملوا take a break او snooze for 30 days او see fewer وريحوا راسكن.
– كل حساب واتساب بحط story أكشن فارغ او بحطو أخبار سريعة (غير موثوقة) وبيرجعوا بيمحوها او بحطوا تساؤلات غريبة عجيبة عن “الحرب / الضربة / …” وغيرها من التساؤلات “التطمينية” وغيرها عملوله mute.
– كل حساب عالسوشيال ميديا او الواتساب بينشر أخبار “نقلا عن الاعلام الع/بري” ما تصدقوه، لان هول الحسابات بجيبوا اخبارن “نسخ ولصق” او “forward” من حسابات غير موثوقة متلو كمان، لان ما حدا بترجم “عب/ري” وبوزّع للعالم ترجماته “بلوشة” او من دون “أهداف خفية”، ومصادر هيك اخبار لازم تستقوها من جروبات اخبارية موثوقة ومشهود لها انها صادقة ومنها مباشرة مش عبر جروبات لجروبات لجروبات يلي اغلبها بتطلع اخبار مدسوسة او مركبة!
– ما حدا يتشاطر يعمل فيها انو هوي/هيي ضابط الحرب النفسية المضادة ويتذاكى وينشر اخبار كرمال يدعم “الأنا” تعوله أو كرمال “شوفيني يا … ” أو انو يابا هوي عم يقوي معنويات “المجتمع والبيئة”، انت قوّي حالك بحالك وتروك العالم بحالها، اما المتخصصين بهيدا العالم فمشكورين على جهودكم.
– اختاروا كم حساب على الفايسبوك والتويتر يكونوا حسابات موثوقة وبتخاف الله وعم تعطيكن صورة واضحة عن الوضع (أخبار او تحليلات)، ومش ضروري يكونوا ١٠٠، بيكفي حساب او ٢ او ٣ مش أكتر!
– حضرتك/تِك لما مش محلل جيوسياسي وخبير استراتيجي عسكري مقتدر بمعلوماتك وتحليلاتك ما تعيشها عال”تايم لاين” عندك للناس يلي عم يتابعوك، اذا بدك لايكات ومتابعات في شركات كتيرة بتبيعهن!
طبعا بعد في ملاحظات كتيرة، بس هيدي الجرعة الاولى، والباقي رح يكونوا على شكل منشورات متلاحقة.
بالاخير، خلي هيدي الاية نصب عينيك (مَا يَلْفِظُ مِنْ قَوْلٍ إِلا لَدَيْهِ رَقِيبٌ عَتِيدٌ)، كل كلمة عم تكتبها وتنشرها وما الها داعي او مش موكل انت تنشرها او تطلع غلط وينزعج منها شخص واحد من هالبشرية رح تتحمل انت مسؤوليتها، غير كاس الدم يلي بدك تشربه/بيه يوم القيامة (هذا سهمك من دم فلان)!
#التوعية #التوعية_المجتمعية #التوعية_الرقمية #الحرب #تكنولوجيا #الامن_الاجتماعي #الامن_الاعلامي
