عودة إلى ١١-١١ يوم الش🌷ي
(عذراً، ما بقدر إختصر🌷)
عن محاولة تفسير شو يعني #أحياء_فينا
عن سجود لله ألف سجدة شكرا قضاء عن 39 سنة لهلأ.. إنا كنا عايشين مع ملائكة ، منهم خلصوا مهمّتهم عالأرض و أوصلونا إلى بر الأمان.. ورجعوا عالسما.. ومنهُ من ينتظر ..
عن إنه مش قادرين نشخّص إحساسنا إذا منفرح بأن هلقد نحنا أقوياء انه عنا هيك نوع من البشر عاشوا وعايشين كرمالنا! أو منبكي لأن
الأدرنالين يلي عم توصل للسما بكل لحظة نصر وكل تشييع شه🌺يد ومش عم نفهم هي أدرنالين السعادة او الحزن !
ما نحنا حيّرنا هالعالم حولنا بخبرياتنا بمواقف الشهادة والفقد وغيره .
منفرح ومنبكي على حجم الفرح مش على حجم الزعل والحزن
جد حيرنا العالم فينا !
أنا الحقير أمام عطاء الش🌸داء ، بمجالنا عالم الفن والتصوير والإخراج وتفاصيله ، لما منكون عم نعطي إستشارة فنية أو درس عن كيفية وأصول صناعة فيلم وثائقي وطبعا عالعلم بكون عُصارة من مطالعة عشرات الكتب الغربية والمحلية والمُتفق عليها بعالم السينما وتُعتبر مراجع..
منأكّد على كذا ملاحظة أساسية كونه الفيلم الوثائقي بيتميّز عن غيره من الأنماط انه واقعي وبعيد عن الخيال..
مثلا : بخصائص الفيلم الوثائقي منأكد على فكرة انه :
– يعتمد على الحيادية وتقديم الحقائق مباشرة للمخاطب دون تحريفها
– المعالجة الخلاقة للواقع
– عكس قصص أناس حقيقيين ووقائع علمية أو تاريخية بعيدة عن الخيال
بخصوص نقاط ضعف الفيلم الوثقائي منركز على كم فكرة كمان انه ما يكون :
– قصة ضعيفة
– تمثيل ضعيف
– لوكيشن سيء
وفي كذا نوع من أنواع الوثائقي بلا ما وجّع راسكم وإطوشكم .. بس ذكرت ما ذكرته لأقول إني بضحك لما أقعد راجع هالنقاط وإعملهم إسقاط على وثائقي بيحكي عن الشهدا… بالنسبة لتحرف الحقائق.. اذا مخاطبك خارج البيئة، مين رح يصدقك انه شهيد يفدي مجموعة بروحه! او شهيد يتصاوب ويكون عم يشعر بأصعب ألم، بس لأنه قائد مجموعة وما بدو يحسس اي حدا من الافراد انه أصيب.. بشد على حاله لبعد ما تخلص المهمة وبعدها بيستشهد من كتر الجراح ! مين رح يصدقك انه في ناس يتقاتل دون مقابل! و مين بصدقك اذا بتحكيله عن أحلام ومنامات صارت مع الشهدا.. عن كرامات أهل البيت ولطفهم وتدخلهم!!
عن إنه الحيوان بجبل صافي و بمليخ هوي يلي دلّ مجاهدين على شهدا وجرحى عالقين! صبعة يصدقوا ..
اذا جيت تفكر بفكرة عكس قصص ناس حقيقيين، ومعالجة خلاقة للواقع، مين رح يصدق انه فيه هيك ملائكة وفي هيك أسود وفي هيك قلوب ما في أرق منها على بعضها، وما في أقوى منها بالمواجهة.. لما تشوف شاب متل الأسد واقف بوجه كتيبة وعم يقاتل ويقوم وينط ويقفز وزأرته بتخوف.. لما يستشهد رفيقه حدو بياخده بحضنه وبصير متل الطفل ، ما بقله الا يا عمري ويا روحي ويا قلبي ( وعيدي راجعين لها بعد شوي) ..
اذا جيت تفكر اذا ممكن يكون في الفيلم نقاط ضعف مثلاً، قصة ضعيفة او ضعف بالتمثيل او ضعف بالتسجيل…(النريشن) …
انه مشهد أم عم توزع حلو وبقلاوة يوم تشييع ابنها! أو عن أب لما وصلوا لعنده جماعة القطاع ليخبروا إنه ابنه استشهد وهني ملبّكين، بقوم بيطلع فيهن وبقلهن شو بكن؟! حسين استشهد؟! اي وخير انشالله ، اصلا من طلّتكم علينا حسّني قلبي.. الله عطى والله أخد… رفعلي راسي الله يرفع راسه دنيا وآخرة..
مين بدو يقنع المشاهد انه ما في ضعف بالتمثيل اصلاً لأن هالمشهد مش تمثيل ؟! هالأب واقعي وهالأم واقعي..(وطبعاً في ناس ما قدرت هلقد تكون صابرة لأن ما تعودنا نكذب ونخدع، في ناس انهارت وفي ناس ضعفت وفي ناس بكيت وفقعت بلحظتها.. بس جمعهم كلهم شي واحد بس هو العزة والكرامة والشرف لي شعروا فيه بلحظة التشييع..
مين بدو يجيب سيرة ضعف بالصوت اذا انت عم تعرضله مشاهد صلاح غندور (بهيديك الضحكة لي بيفقعها ) وبقوم ببوس السيد وبكون ماشي على العملية، وحاطط نريشن صوت بنته هي وعم تقله
“عندما حضنتني بالأمس يا أبي..
لم تعد صباحاً.. ما أيقظتني .. ما حضنتني ..
ما قبّلتني ..”
لك مين بضل في حيل يوقف على إجريه وعم يسمع هيك صوت! مين باله بجودة الصوت والشحار.. لك الكلمات لحالها بتخرق العظم مش الجلد ولا اللحم ..
بضحك أكتر والدمعة بعدها بعيني لما أوصل لنقطة ضعف تانية هيي ضعف اللوكيشن (مكان التصوير ) .. عن أي مكان ومكان بدك تحكي ؟! جرود ، صحاري ، وديان ، مغارات، بيوت مدمرة، سهول ، جبال؟؟ لك ما كلن جربوهن ؟!
ما هي الأماكن لي استشهدوا فيها هالشباب السيارات أصلاً ما بتوصلها.. لتاخد فرق ومعدات وكاميرات تصور فيها..
بلا طول سيرة… وهالمقدمة للبعض مش أكتر، عشان بتعرف نحنا متهمين انها طاحشين وماشيين، وانفعاليين وعواطف ومشاعر وقال ولاية وهلقد ولا منعرف شي ولا منفهم شي وجماعة تراجيديا.. خطاب عالي النبرة شوي بحمّسنا وبسيطر على عقولنا.. ومش عارفين إنه صاحب الخطاب واقف على إجريه بسببنا (شهداءنا) وبسبب الوعي والفهم والعلم والمبادىء يلي كلهم ما إلهن قيمة لو ما الإيمان والولاية والطهر المتصل بالله عزّ وجل ..
مهم..
كيف #أحياء_فينا ؟!
ليش فكرك هني ماتوا بالأصل؟!
او فكرك نحنا مننسى ناس ما عاشوا عمرهم ليخلوا غيرهم بعيش بكرامة ؟!
او فكرك مننسى شو قدّمنا وشو ضحّينا لوصلنا ليوم العالم كله عم يحكي فينا ؟!
من وين بدك تبلش لتبلّش وشو بدك تسرد لتسرد..
بدك تبلش من #جماعة_82 ! أو ال 90 او 2000 لل 2021 !!
بدك تبلش من قمر بكل قواه العقلية.. باع الدنيا وكب الضهرات والكزدرة والحب وشم الهوا ورا ضهره.. شاب بدو يعمل عملية استشهادية!
بتعرف شو يعني؟! يعني بدو يصير أشلاء، يعني مش رح يرجع حتى جثمان.. يلي إذا لقوا منو شي يا دوب يلاقوا كم “وقيّة” .. عملية استشهادية.. مش انتحارية.. شو الفرق ؟! الفرق انه بدها فتوى من مرجع ديني عالم .. ليشخص انه في مصلحة تبعد عدو عن أرضك ، لأن ما عندك وسيلة تحاوب فيها وما عندك عدد وما عندك حدا داعمك.. عدو عم يغتصب عرضك..
مهم.. بس تجي الفتوة، اقعد اقنع الشباب وارضيهم لترسى على اخ واحد للعملية.. لك كلو بدو هوي ينفّذ.. تقول نزهة.. تقول منصب.. تقول جاه .. تقول مكسب .. واي صح .. هودي الناس هيك شي عندهن ياه جاه ؟! الوجيه الش🌸يد.. فيه أهم من هيك لقب ؟!
المهم بعد خلاف طويل عريض وقبول الجميع انهم يعملو قرعة.. وهيدي كانت أفكار السيد عباس والحاج الكبير.. يسحبه إسم والكل يضطر يرضى.. طبعاً أنا بقدر اتخايل دمعة السيد عباس وهو وفرحان بس هيدي الفرحة لي ما الها وصف.. لي بتجي كلها دموع.. لي بتحس فيها شي متصل بالله دغري.. هي نشوة فرح على حزن على انه شكراااا يا الله انه في هيك ناس!!! في هيك روحية !!! في هيك إرادة!! في هيك حدا صدّقنا انه نحنا مشينا بالخط لنحمي العرض والشرف وما عنا شي نوعد فيه !!!
في حدا هلقد وثق بهالمسيرة !! هلقد انت راضي عنا يا الله ؟!…
بينتخبوا الإسم، ويتفقوا على موعد.. ويروح الأخ على بيته ليعيش آخر لحظات حياته مع زوجته..
وليك مش دراما.. بس نيال إجرين هيدي ” المرا “
يلي الله هلقد بحبها وهلقد ناطرها شي بالجنة لي هيي زوجة شهيد ..
و كيف يعني أحياء فينا ؟!!
بعد الثمانينات… وبالانتصارت الأخيرة القريبة.. يعني يمكم صارت دارجة فكرة انو طالع عالجبهة.. وفي احتمال يستشهد .. تقريباً فيك تقول صارت مبلوعة الفكرة..
بس خيي من ٤٠ سنة.. الوضع كان غير .. كان كلياً غير .. كانت يلي يجيها عريس من الحزب ، وصارت وسامعها باذني للقصة.. كانوا يقولوها : ” والله بكرا لنشوفك عم تشحدي ودايرة عالجوامع، ما لقيتي الا فلان الفلاني وبالحزب ؟!! “
فكيف بوقتها يستشهد، لا و مش انه ممكن يستشهد.. حدا رايح يستشهد وعارف ومتيقين..
خي انا هون بشرد شوي وبفكر .. بسبب الوضع الأمني ، كان ممنوع حدا يعرف بالعملية..
طيب هيدا الملاك .. يلي قاعد صبحية هوي وزوجته.. وهي نازلة سوالف وتخطيط.. وهوي صابر رايق هادىء عم يسمع ولا تقول رايح يستشهد
طيب كيف ؟!
يا عمي اذا الواحد منا مسافر ورايح يشتغل شغل يقبض مليون دولار بالشهر.. اذا شرد شوي هوي وعم يفكر بالوداع بيبكي وبتعزّ عليه الدنيا وبضيق خلقه وبشوّب ..
طيب تخايل معي .. هيدا لي زوجته قاعدة تحكي وتقله شو ناوية وهوي لا قادر يقلها معاش تخططي يا بنت الحلال انا من بكرا مش موجود.. ولا قادر يقلها خطط ويضحك عليها ..
هيدا الصبر من أي مدرسة جابه؟! من أي دين! من أي عقيدة! من أي إيمان!
تكون قاعدة زوجتك (الحامل).. وعم تخبرك انه بعد اسبوع رايحة تراجع الدكتورة .. ورح تعمل هيك و تسوي هيك.. وتقلك شهرين زمان ومنخلص.. شو بدنا نسمي الولد ؟!
لك انت اي جبل حتى تسمع هيك كلمة وتعرف تتعامل مع الموضوع ما تخليها تشتلق عشي؟!
انت اي ولي من الاولياء..
بعد الضهر.. بتكون عم تقلب عالتلفزيون.. بتشوف صورته 😊 وبتعرف إنه استشهد…
و كيف يعني أحياء فينا ؟!!
بعدين صار في تطور.. بمحلات صار في إمكانية تخبر عيلتك اذا بتضمن انه ما يأثر على المصلحة العامة..هون إنسى الشهيد خيي .. هيدي فهمناها خلص هودي ملائكة مش بشر..
طيب هيدي الزوجة لي عم تحطها بموقف تطلب منها تدعيلك الله يوفقك بعمليتك وينصرك ويعطيك يلي ببالك! هيدي بتقل أجر عن الشهيد ؟!
هيدي كمان بشر عادي ؟!
هيدي هلقد بتحب السيدة الزهراء؟! هلقد واصلة درجة الإيمان ! هلقد قادرة تبيع كل شي وتعطي حقه لله !
و كيف يعني أحياء فينا ؟!!
هيدا يا خيي لا كان موعود بعشا مع الرسول.. ولا بزواج من حور عين .. ولا بالقضاء على أمة كافرة.. ولا شي من هودي .. هيدا كان موعود بنصر من الله وفتح قريب ..
فتح باب لكللللللللللللل الجيل يلي اجا من بعدو ليقدر يوقف ويحمل سلاح ويقاتل ويقول انا بموت بنذل ولا بخضع ولا ببيع شرفي بشوية دولارات..
جماعة ال ٨٢ بكونوا عم يحكوها ويضحكوا.. انه كيف كنا نعيش ب ٤٠$ بالشهر بوقت كان اقل معاش بسويسرا الشرق ١٠٠٠$
مشيت هالمسيرة وكبرت، عاشوا المر، كرهن القريب قبل البعيد ، انظلموا.. تبهدلوا.. أهينوا على الحواجز.. أهينوا على أيدي العملاء..
مش سهل ابن الضيعة العميل.. يجي يرمي الشهيد قدام عيون أمّه.. ويقلها خدي يا …. متل ما وعدتك .. جبتلك ياه مغسّل بدمه .. وصارت..
مش سهل ابنك يستشهد وانت مش عارف وتعرف بعد سنين.. مش سهل تعرف انه ابنك استشهد وما تقدر تعمل عزا.. ما تقدر تقول انه انا بيو .. مش خوف لا؟! بس حرصاً على أرواح أهل ضيعتك وبلدك..
مش سهل العميل يجي يحط إجريه بوجه أم شهيد ويقلها بدك تعترفي وين ابنك التاني او بلحقو باول واحد !!! واذا انت حكيت هيي حكيت ..
ولما حكيت، قالتله فشرت..
و كيف يعني أحياء فينا ؟!!
بتحي عن الثمانينات بتخاف تظلم هالجيل الجديد، بتحكي عن الجيل الجديد بتخاف تظلم القديم..
تاريخ كله عز وفخر ومجد.. كيف صارت هالإنتصارات
ببارودة وسلاح؟! وصاروح ودبابة؟! لا وألف لا ..
بس هودي جماعة بيعتقدوا انه أفرادهم رزق
والرزق يلي ما بينفق منه بسبيل الحق .. الله ما ببارك فيه..
نحنا حضرنا شوي من الشهدا يلي استشهدوا بسوريا..وشفنا كيف استشهدوا.. بس ما شفنا من ٣٠ سنة كيف كان يستشهد ومين كان يحملوا؟!
كيف كانوا يسعفوا ..
نحنا حضرنا شباب استشهدوا بحضن رفاقهم.. بتعرف شو يعني توقع بحضن رفيقك يقلك يا عمري ! يا روحي ! يا قلبي !!
بتصير تتذكر زوجتك آخر مرة خبرتك ياهن ؟!
لك اوف اوف.. في شي صعب ينحكى والله
هيدا الشهيد ما اجا من السما وحيد.. هيدا عندو أم وأم وأخت وزوجك وخطيبة .. عنده أهل ..
لما ياخدك المشهد لعند بوابة مقام السيدة زينب ويكون بينك وبين المسلح ١٥ متر.. ويقلك جايين نسبي نساؤكم متل ما سبينا زينب من ١٤٠٠ سنة!!
شو ممكن تحس! شو ممكن تتخايل!!
لما تلاقي أسود وقفوا وعملوا أجسادهم درع للمقام وما هان عليهن حدا يلمس المقام .. بموتوا بيشتشهدوا بيشقفوا آخر هم…
هونيك كانت كربلا فعلاً، وهونيك بينك شو يعني يا ريتنا كنا معكم .. وهونيك كان تلبية نداء لبيك يا زينب بالفعل… هونيك علمونا شو يعني وقت الجد نلبي نداء يا حسين !!
و كيف يعني أحياء فينا ؟!!
لما كان التلج يوصل لل ٣ امتار.. تشوف شباب متل لون الورد ، عم تسخن ماي لتتوضأ فيه.. لتصلي ركعتين صلا.. هودي مش ملائكة؟! هودي مش عايشين فينا؟! هودي مش الهم دين برقبتنا؟!
هودي تمسخرنا عليهن وسألناهم شو الله جابركم يصير فيكن هيك .. محرزة هال 500$ آخر الشهر؟!
في شباب تصاوبت وبُترت أطرافها، ما تصاوبت برصاص ولا بقصف ولا بقذيفة ولا بصاروخ ولا بمواجهة ..
بُترت أطرافهم لأن تجمدت تحت حرارة ناقص ٢٠ وما كانوا يتركوا لأن تكليفهم يقبوا ليحموا آلاف القلوب من انه تبرد من الذُّل ..
نحنا منحكي ومنسولف ومنسطر نصوص عالبارد المستريح، ومننقل أحداث صارت ومنفتخر فيها..
هنيئاً ليلي صنعها والله يعين قلب لي شافت أصعب المشاهد قدام عيونه وما قادر يعمل شي ..
يلي كان مع صديق شهيد الو عم يتسللوا ليزرعوا عبوة بعاد عن المسلحين أمتار.. بقوم بيتصاوب رفيقه وبيستشهد.. وبيتراجع.. وبصير القناص كل ٥ د يقنص الش🌸يد بطلقة وما يخلي حدا يقرب يسحبه.. وضل هييييييييييك لليل..
الجهاز واقع حده ..
مسؤوله عم ينادي : يا حيدر حيدر حيدر..
وحيدر حد الجهاز وجسده صار غربال…
صعبة عالسمع صح؟!
طب شو احساس يلي حضر هيك مشهد وما قدر يسحب الجثمان لصار الليل!؟
و كيف يعني أحياء فينا ؟!!
بسم الله الرحمان الرحيم
والش🌷داء عند ربّهم لهم أجرهم ونورهم..
نور الله سكنَ في الشهداء
فصار كُلُّ نورهم نَيِّر
وكلُّ جمالهم جميل
وكل عظمتهم عظيمة
وكُلُّ بهائهم بهي
وكُلُّ أسمائهم كبيرة
المجدُ للش🌷داء
#علي_القاضي
#أحياء_فينا
